Benvid@s!
Comezamos unha nova andaina neste espazo aberto a toda a Comunidade
Educativa. Compartiremos novas, coñecementos, reflexións, creacións literarias,
… en tódolos formatos escritos e audiovisuais.
Ademais, este Curso 2020-2021 poñemos en marcha un novo proxecto denominado:
Lingua: Tradición e Cultura, que nos sirve para amosar e recompilar
traballos relacionados co mundo da Cultura, das Artes e da Tradición, tendo
como punto de partida o noso idioma. Centrado na contorna, no entanto, sempre
aberto á realidade galega no máis amplo senso.
Abordaremos o proxecto de formas diversas. Contamos con catro seccións
temáticas, pero o Equipo de Dinamización anda cavilando noutras (a cabesiña
non para!) e … tamén agardamos novas ideas! Para poñerlle nome a estas
seccións ou apartados, inspirámonos no léxico e fraseoloxía mariños. É a nosa
homenaxe ao mar, esencial na nosa idiosincrasia. Velaquí as seccións:
1. O compás:
“Aparello consistente nunha superficie circular onde están representados os
puntos cardinais, cunha agulla imantada que indica a dirección norte”
É o nome escollido para o apartado das Datas Sinaladas, no
que coñeceremos mellor as orixes, motivacións e características das
conmemoracións do Calendario Escolar e os nosos festexos.
2. Salseiros:
“Pingas de auga moi miúdas ou escuma que producen as ondas do mar ao bater
contra as rochas ou contra unha embarcación”.
Identificamos de xeito figurado este termo cos pensamentos e
reflexións que queremos compartir. Eles son os salseiros que
voltan no noso corpo despois dunha viaxe polo mar.
3. Barlovento:
“Lado de onde vén o vento”
O barlovento fai referencia, no noso maxín, ás creacións artísticas
(Música, Debuxo, Literatura, Fotografía, Cinema, …), que enriquecen a Cultura
do pobo.
4. Na mallante:
“(mallante) Liña que se forma na beira da praia por acumulación de algas,
ramas ou outros residuos do mar, e sinala o punto ata onde subiu a marea”.
Esta imaxe sérvenos para falar de todo o que teña que ver coa nosa
Historia, Tradición e Cultura. O que o tempo nos foi deixando.
Contamos coa canle de YouTube “Imos á seca na Basella”, na
que organizados pola nosa compañeira Inés, participou o curso pasado un valente
grupo de alumnos/as de 1ºESO. Será un
instrumento para transmitir información de calquera das nosas seccións.
Comentarios
Publicar un comentario